Ræktunar- og fræðslusetur að Dalsá

Matjurtanámskeið vorið 2022

Nú er komin ný dagsetning á fyrsta hluta námskeiðsins, 12. apríl. Dagsetningar II. og III. hluta haldast óbreyttir.

Námskeið um ræktun matjurta verða haldin hér á Dalsá á þessu vori eins og mörg undanfarin ár. Tímasetning námskeiðanna skýrist af því að lögð er áhersla á verklega kennslu, þannig að taktur vorkomunnar ræður. Að sjálfsögðu legg ég áherslu lífræna ræktun.

Skráning og frekari upplýsingar: hanna@smart.is eða í síma 899 0378.


Ræktun matjurta frá fræi:


I. hluti þri.12. apríl kl 19:30 – 21.30.

Í þessum fyrsta hluta námskeiðsins er fyrirlestur um lífræna ræktun, skipulag garðsins, vaxtarrými, sáningu og uppeldi, um jarðveginn og áburðarnotkun í lífrænni ræktun o.fl. o.fl.

II. hluti þri. 19. apríl kl 19:30 - 22:00.

Í öðrum hluta er fjallað um einstakar tegundir matjurta og forræktun þeirra. Þátttakendur læra að sá og prikla og fara síðan heim með sáninguna og smáplönturnar til framhaldsræktunar heima hjá sér.

III. hluti fim. 12. maí kl 19:30- 21:30.

Í þriðja hluta er vinnsla beða tekin fyrir og einnig áburðarefni sem notuð eru í lífrænni ræktun. Að sá beint út í beð og gróðursetja matjurtaplönturnar. Kennslan fer að mestu leyti fram úti í garði.

Skráning og frekari upplýsingar: hanna@smart.is eða í síma 899 0378.

Þátttökugjald: kr. 19.500 kr


Kvöldnámskeið- matjurtaræktun

Fim. 11. maí kl 19:30 - 22:00

Námskeiðið er ein kvöldstund og er ætlað þeim ræktendum sem ætla ekki að forrækta plöntur sínar heldur kaupa þær í gróðrarstöðvum, en þurfa leiðbeiningar um ræktunina. Fyrri hluti kvöldsins fer í fyrirlestur um ræktun matjurtanna og síðan verður farið út í garð, jarðvegurinn skoðaður, hvaða áburðarefni eru notuð í lífrænni ræktun, sáð og gróðursett í beð.

Þátttökugjald kr 7.000 kr




Það er ekki ofsögum af því sagt að grænmetið er fallegt!


-----------------------------------------------------------------------------------------------------------------------------------------------------------------------------

Ræktunar- og fræðslusetrið á Dalsá - kynning

Vorið 2011 lét ég draum minn um stofnun Ræktunar- og fræðsluseturs rætast. Ég bý að Dalsá í Mosfellsdal og hér eru kjöraðstæður bæði til ræktunar og námskeiðshalds, enda hafa í gegnum árin verið haldin hér ýmis konar námskeið og allt mitt líf hef ég stundað ræktun. Markmið með starfsemi setursins er að hjálpa fólki við að tengjast náttúrunni, að efla lífræna ræktun í heimilisgörðum og að reka gróðrarstöð með lífræna grænmetisframleiðslu.

Stefnt er að því að fólk eigi erindi hingað til að upplifa og njóta sín, hafa tækifæri til að kaupa afrakstur ræktunar og handverks og sækja ýmis námskeið, tengt ræktun, handverki og listum. Börn eru sérstaklega velkomin.

Starfsemi mín byggir á reynslu og þekkingu sem ég hef aflað mér í gegnum árin, í ræktun, fræðslu og uppeldisfræði. Staðsetning og aðstaða til ýmis konar námskeiðshalds fyrir litla hópa er mjög góð hér í jaðri höfuðborgarsvæðisins, uppi í sveit en þó svo nærri þéttbýlinu.

Hver ég er? Jóhanna Borghildur Magnúsdóttir heiti ég, ættuð af Snæfellsnesi og Árnessýslu. Ég er garðyrkjufræðingur að mennt og á einnig að baki menntun í Waldorf-uppeldisfræði. Flest sem ég hef tekið mér fyrir hendur um ævina er tengt náttúrunni og fræðslu.

Áður en ég sneri við blaðinu og stofnaði Ræktunar- og fræðslusetrið, vann ég í fimm ár við lífræna ræktun í Hæfingarstöðinni Bjarkarási. Það var ánægjuleg reynsla að vinna með fólki með þroskahömlun og góð reynsla að vinna að vottaðri lífrænni ræktun.

Viltu koma á námskeið?

Viltu halda námskeið í gefandi umhverfi?

Viltu kaupa lífrænt ræktaðar matjurtaplöntur til framhaldsræktunar heima eða í sumarbústaðnum?

Viltu kaupa lífrænt ræktað grænmeti?

Viltu heimsækja landnámshænur og skemmtilegt umhverfi með börnunum?

Þá áttu erindi að Dalsá