Forsíða

17. mars 2017

Nú er skráning í gangi á matjurtanámskeið vorsins. Þau eru haldin hér á Dalsá og eins og alltaf legg ég áherslu á lífræna ræktun og verklega kennslu. 

Námskeiðið er í þremur hlutum: 

Í fyrsta hluta námskeiðsins er fyrirlestur um einstakar tegundir, vaxtarrými, sáningu og uppeldi, um jarðveginn og áburðarnotkun í lífrænni ræktun o.fl. o.fl.

Í öðrum hluta er fjallað nánar um forræktun og þátttakendur læra að sá og prikla og fara síðan heim með sáninguna og smáplönturnar.

Í þriðja hluta er vinnsla beða tekin fyrir og einnig áburðarefni sem notuð eru í lífrænni ræktun. Að sá beint í beð og gróðursetning matjurtaplantna.


SKRÁNING: hanna@smart.is eða í síma 899 0378

18. febrúar


Hér er yfirlit yfir matjurtanámskeiðin mín í vor. Hlakka til að heyra frá áhugasömum ræktendum.


Ræktun matjurta frá fræi

  • I. hluti - fim. 30. mars -    II. hluti - miðv. 19. apríl -  III. hluti – fim. 11. maí

Í fyrsta hluta er fjallað er um einstakar tegundir, vaxtarrými, sáningu og uppeldi, um jarðveginn og áburðarnotkun í lífrænni ræktun o.fl

Í öðrum hluta er fjallað nánar um forræktun og þátttakendur læra að sá og prikla.

Í þriðja hluta er vinnsla beða tekin fyrir og einnig áburðarefni sem notuð eru í lífrænni ræktun. Að sá beint í beð og gróðursetning matjurtaplantna.

Ræktun í pottum og kerjum á svölum og pöllum

  • miðv. 5. apríl og  mán. 24. apríl

Rætt verður um ræktun matjurta og blóma á svölum og pöllum, um val á plöntum, jarðveg og áburðargjöf, vökvun og fleira varðandi umhirðu plantnanna og síðan verður sýnikennsla í að sá og planta í potta. 

Kvöldnámskeið –  matjurtaræktun

·          þri. 9. maí og mán. 15. maí

Námskeiðið er ætlað þeim ræktendum sem ætla ekki að forrækta plöntur sínar heldur kaupa þær í gróðrarstöðvum, en þurfa leiðbeiningar um ræktunina. Fyrri hluti kvöldsins fer í fyrirlestur um ræktun matjurta og síðan verður farið út í garð, jarðvegurinn skoðaður, hvaða áburðarefni eru notuð í lífrænni ræktun, sáning beint í beð og gróðursetning.

23. janúar 2017

Í upphafi hvers árs vaknar löngunin til að sá og huga að ræktun. Nú er ég byrjuð að skipuleggja sáningu og ræktun en einnig ræktunarnámskeiðin sem ég hef haldið í þó nokkur ár. Í þessari viku mun ég setja hér á vefinn áætlun um námskeiðin og hlakka til að heyra frá áhugasömum ræktendum.


____________________________________________________________________

4. febrúar 2016

Sólin hækkar á lofti með hverjum deginum. Meðfylgjandi mynd er tekin þegar fyrstu sólargeislar ársins sáust hér á Dalsá, en sólin nær ekki að skína hér í ca einn og hálfan mánuð í skammdeginu. Veturinn er snjóasamur og skaflar sem mynduðust í nóvember eru enn þykkir og hætt við að þeir verði þaulsetnir. En þá er gott að hafa gróðurhús í garðinum þar sem hægt er að byrja vorverkin. Það er mín skoðun að gróðurhús ætti að vera í hverjum garði og svalirnar geta líka nýst vel til ræktunar.

Ég býð einmitt upp á námskeið, bæði um notkun heimilisgróðurhúsa og um ræktun á svölum og pöllum. Einnig um ræktun matjurta frá fræi og fyrir þá ræktendur sem kjósa að kaupa plöntur á gróðrarstöðvum. Undir tenglinum matjurtanámskeið má sjá lista yfir námskeiðin sem ég mun halda núna í vetur og vor. Eins og fyrr legg ég áherslu á lífræna ræktun og verklega kennslu á námskeiðunum mínum.



 

Það er ekki ofsögum af því sagt að grænmetið er fallegt! 

Þetta er sýnishorn af uppskeru síðast liðins sumars. 

-----------------------------------------------------------------------------------------------------------------------------------------------------------------------------

 Ræktunar- og fræðslusetrið á Dalsá - kynning


Vorið 2011 lét ég draum minn um stofnun Ræktunar- og fræðsluseturs rætast. Ég bý að Dalsá í Mosfellsdal og hér eru kjöraðstæður bæði til ræktunar og námskeiðshalds, enda hafa í gegnum árin verið haldin hér ýmis konar námskeið og allt mitt líf hef ég stundað ræktun.  Markmið með starfsemi setursins er að hjálpa fólki við að tengjast náttúrunni, að efla lífræna ræktun í heimilisgörðum og að reka gróðrarstöð með lífræna grænmetisframleiðslu. 



Stefnt er að því að fólk eigi erindi hingað til að upplifa og njóta sín, hafa tækifæri til að kaupa afrakstur ræktunar og handverks og sækja ýmis námskeið, tengt ræktun, handverki og listum. Börn eru sérstaklega velkomin.
Starfsemi mín byggir á reynslu og þekkingu sem ég hef aflað mér í gegnum árin, í ræktun, fræðslu og uppeldisfræði. Staðsetning og aðstaða til ýmis konar námskeiðshalds fyrir litla hópa er mjög góð hér í jaðri höfuðborgarsvæðisins, uppi í sveit en þó svo nærri þéttbýlinu.
 
 
Hver ég er? Jóhanna Borghildur Magnúsdóttir heiti ég, ættuð af Snæfellsnesi og Árnessýslu. Ég er garðyrkjufræðingur að mennt og á einnig að baki menntun í Waldorf-uppeldisfræði. Flest sem ég hef tekið mér fyrir hendur um ævina er tengt náttúrunni og fræðslu.
Áður en ég sneri við blaðinu og stofnaði Ræktunar- og fræðslusetrið, vann ég í fimm ár við lífræna ræktun í Hæfingarstöðinni Bjarkarási. Það var ánægjuleg reynsla að vinna með fólki með þroskahömlun og góð reynsla að vinna að vottaðri lífrænni ræktun. 
 

 Viltu koma á námskeið?

Viltu halda námskeið í gefandi umhverfi?

Viltu kaupa lífrænt ræktaðar matjurtaplöntur til framhaldsræktunar heima eða í sumarbústaðnum?

Viltu kaupa lífrænt ræktað grænmeti?

Viltu heimsækja landnámshænur og skemmtilegt umhverfi með börnunum?

Þá áttu erindi að Dalsá


      

  
Comments